انا بنادم صدك ما حط بظهري جناح
اذم واكره واسولف واحجي كلشي الجان
وما اخطط لفرحه ولا دمعة عين
ولا احزن جذب حتى انعرف انسان
من تصهل ضحكتي اعبر لذاك الصوب
ومن تنشغ دمعتي مناشغ المعدان
عالفطره من اسولف ما تهمني الناس
ولا ادور صداقه بكعدة الديوان
وتره اليغلط بحقي انطي وجه عريس
يحس زافوف اريده ولا يحس غلطان
متناقظ لان عايش طبيعي وياك
الما عنده تناقظ هذا مو انسان
تجيني ايام احن لريحة العاكول
وتجيني ايام اذوب بريحة البستان
وتصح مرات امر نسمة بصدر فلاح
وتصح مرات اشح بشهكه عالغركان
انه غير السمار بوجهي مامش لون
وتمرني سنين اتيه وتطك بيه الوان
جنحي من انفتح ما نافست عصفور
لا غرني الصياح وزاحمت خرسان
وتعيرني بعشرتك من جنت وياك
وكلبي بعشرتك كله انترس دخان
انه مسير ضوه لسردابك المسدود
بوكت شمس الضهر ما دكت البيبان

احباب الروووووووووح