يقولون ذاك الواحد والواحد الله في سماه العالي كل إبليسٍ مخزيه الله وكل عدوٍ معاقبه الله..وإلى هاك البنت اللي عندها سبع أخوان وكانوا مدللينها دلال السيف في حلقه وملقه ومفتاح السلطان في يده..وكان عندهم عبد اسمه (فريج) ويكتب ربي ويشوف البنت ويعشقها فقرر يتزوجها وماكان له حيله إلا بقتل أخوانها !!
جهز حاله ووضع لهم السم فقتل الأخوان السبعة يوم مابقي إلاهي قالها بتزوجك قتلت أخوانك علشان أتزوجك. لكن كان لها ولد عم سمع إن أخوانها ماتوا فجأة فجاء لديرتها ليأخذ بنت عمه وما كان يدري عن فريج وأنه هو اللي قاتل عيال عمه..
فريج لما عرف بجية ولد العم قال للبنت إذا جاء ولد عمك بحط له السم وأفتك منه..
فعرفت بنية فريج فدست ورقة في صحن الغداء وكتبت فيها:
يا سامع مني تراهــــــا نصيحة.. حذار عن الخيــال وإن قيل له سم
ترا دنات النفس تدني الفضيحة.. وترا رفيــع النفــس مـا يلحـــقه لـم
ويا فريج كم فرجتهم من قطيعة.. وكم واحدعقب العصـر قلت له سـم
ياطال مارحت تجيــب الذبيحــة.. جيت من المقصب شلايـلك لي دم
بكيت وأبكيت القلوب المريحــة.. مــا لوم عيني لو جرى دمعــها دم
أبكي هلي وأهـل الدلال المليحة.. والسيــــوف اللــي لعـافيظــها دم
من عقب ماني عمة لك مليحه.. الحين ياعبد الخطـى صـرت لي عم
يوم قرب ولد العم يده ليأكل انتبه للورقة وقراها وفهم وش تقصد بنت عمه.. فباعد الأكل عن "منكبه" كأنه يأكل وجلس يكح ويكح..فريج توقع أنه بيموت لكن ولد العم قال أبي حليب خلفات. قام فريج بسرعة يجيب له وهو عارف انه بيموت من أثر السم لكن اللي صار ان ولد العم جاء من وراء فريج وهو تحت الناقة يحلبها وضربه بالسيف وقطع رأسه. أخذ ولد العم بنت عمه وتزوجها.. وجينا منهم ماعطونا شئ..