ناس تقول الحر غول
وناس تقول الحرده
اكيد هيبقى م الفلول
الحر خف
وكل واحد يستعد
بسرعه يمد
ويبدأ النزول
الميعاد قبل تسعه
عشان بلدنا
وقوت ولادنا
ننزل بقه
ونبدأ فى المثول
لجل منكيد العزول
لجل الشيطان يبدأ يزول
يمكن بجد هتتعدل
يمكن رئيس
يكون عِدل
رئيس هيعمل
مش بس يتكلم يقول
تتحسن الاحوال بجد
والعدالة يكون لها
من تانى حد
ساعات و هتبان
ايام وتتعد
يمكن ساعتها ناكلوا لحمه
من بعد ادماننا ع الفول
واللى مش ناوى هيعمل
لابد يرحل
ومحدش يزعل م الاصول
قلبنا 30 سنه محروق
من أم الخلول
30 سنه مسروق
من كل الفلول
30 سنه مرعوب
من أمنا الغوله
ومن أم سحلول
30 سنه وكان مصرى دلدول
انزل بقه
اغلب شيطانك
وع الفساد لازم تبول
اثبت رجولتك
واظهر بطولتك
معدش ينفع المحلول
انزل وعلم بالقلم
دى معركه
ودا مش قلم
حط فى دماغك
انه سيفك المسلول
لازم تصَوِّت
تثبت وجودك
ولايرضيك يقولوا
مصرى مريض معلول
صوتك امانه
بدل المهانه
والاستكانه
حقك ف ايدك
لازم تطول
الصوره مقلوبه
قوم وعدِّلها
عشان تشوفها بالمعدول
اتوكل على الله
خليك بقه مسئول
خلاص بقه لازم تحاسب المسئول
معدش نوم فى العسل
ولا عاد كسل
وزى ما قال المثل
مفيش راجل ينام مبلول
ولا راجل يقف ساكت
عن الحق
ويقف مشلول
اتق الله فى مصرنا
وابدأ بالنزول
قبل ما النعمه تزول